Nú er Víkingur Ó búinn að spila einn æfingaleik gegn Stjörnunni sem vannst 6-2. Búið er að staðfesta þrjá æfingaleiki áður en Lengjubikarinn byrjar.

Þann 5.febrúar mun Víkingur Ó spila æfingaleik gegn 1.deildarliði BÍ/Bolungarvík í Kórnum kl. 16.00. Fjórum dögum síðar mætir Víkingur Ó Pepsídeildarliði ÍA í æfingaleik í Akraneshöllinni (hef ekki tímann) og þann 12 febrúar spilum við æfingaleik gegn Pepsídeildarliði Fylkis í Akraneshöllinni (hef ekki heldur tímann ennþá).

Þegar þessum leikjum er lokið blasir við alvaran því þá hefst Lengjubikar A og fyrsti mótherji okkar er Íslandsmeistarar og bikarmeistarar KR með Þorstein Má Ragnarsson innanborðs. En Þorsteinn Már má ekki spila gegn okkur og þar erum við heppnir enda toppleikmaður á ferð. Við spilum við KR í Egilshöllinni þann 18.febrúar en Þorsteinn Már verður ekki löglegur með KR fyrr en 22.febrúar.

Það er margt að hlakka til.

Mótanefnd KSÍ hefur sett inn dagsetningar fyrir leikina næsta sumar. Mótið er enn í vinnslu hjá þeim og þar af leiðandi eru þetta drög sem geta breyst. En yfirleitt eru litlar breytingar og það sem er öðruvísi frá síðasta sumri er það að leikirnir eru nánast alltaf kl. 14.00 á laugardögum eða kl. 20.00 á föstudögum. Svo koma örfáir leikir aðra daga. Þetta þýðir það að við sem þurfum að ferðast í leikina hvort sem við erum staðsett fyrir vestan eða sunnan ættum að eiga betur heimangengt. Ráðgert er að mótið byrji þann 12.maí 2012. Það eru 13 leikir á laugardögum, 6 leikir á föstudögum, 2 á þriðjudögum og einn á miðvikudegi.

En skoðum leikina hjá Víking Ó.

12.maí	lau.	14.00	Ólafsvíkurvöllur	Víkingur Ó - Fjölnir
19.maí	lau.	14.00	Sauðárkróksvöllur	Tindastóll - Víkingur Ó.
26.maí	lau.	14.00	Ólafsvíkurvöllur	Víkingur Ó - Höttur
2.jún.	lau.	14.00	Þórsvöllur	Þór - Víkingur Ó.
9.jún.	lau.	14.00	Ólafsvíkurvöllur	Víkingur Ó - Þróttur
15.jún.	fös.	20.00	Ásvellir	Haukar - Víkingur Ó.
22.jún.	fös.	20.00	Ólafsvíkurvöllur	Víkingur Ó - Leiknir R.
30.jún.	lau.	14.00	Ólafsvíkurvöllur	Víkingur Ó - BÍ/Bolungarvík
6.júl.	fös.	20.00	ÍR völlur	ÍR - Víkingur Ó.
13.júl.	fös.	20.00	Ólafsvíkurvöllur	Víkingur Ó - KA
17.júl.	þri.	20.00	Víkin	Víkingur R. - Víkingur Ó.
21.júl.	lau.	14.00	Fjölnisvöllur	Fjölnir - Víkingur Ó.
28.júl.	lau.	14.00	Ólafsvíkurvöllur	Víkingur Ó - Tindastóll
1.ágú.	mið.	18.00	Vilhjálmsvöllur	Höttur - Víkingur Ó.
11.ág.	lau.	14.00	Ólafsvíkurvöllur	Víkingur Ó - Þór
17.ág.	fös.	19.00	Valbjarnarvöllur	Þróttur - Víkingur Ó.
21.ág.	þri.	18.30	Ólafsvíkurvöllur	Víkingur Ó - Haukar
24.ág.	fös.	18.30	Leiknisvöllur	Leiknir R. - Víkingur Ó.
1.sep.	lau.	14.00	Torfnesvöllur	BÍ/Bolungarvík - Víkingur Ó.
8.sep.	lau.	14.00	Ólafsvíkurvöllur	Víkingur Ó - ÍR
15.sep.	lau.	14.00	Akureyrarvöllur	KA - Víkingur Ó.
22.sep.	lau.	14.00	Ólafsvíkurvöllur	Víkingur Ó. - Víkingur R.

Æfingaleikur
Akraneshöll

Víkingur Ó - Stjarnan   6-2   (3-1)

0-1  Erlendur leikmaður í skoðun hjá þeim  (6.mín)
1-1  Steinar Már Ragnarsson (8.mín)
1-2  Alfreð Már Hjaltalín 
1-3  Steinar Már Ragnarsson
1-4  Steinar Már Ragnarsson
1-5  Alfreð Már Hjaltalín
1-6  Edin Beslija
2-6  Nafn vantar (vítaspyrna)

Í dag lék Víkingur Ó sinn fyrsta leik á árinu. Mótherjinn var Pepsídeildarlið Stjörnunnar. Bæði lið voru án sterkra leikmanna. Hjá Stjörnunni vantaði 4-5 leikmenn og ungir sprækir leikmenn fengu að spreyta sig með reyndari. Hjá Víking Ó spiluðu nokkrir leikmenn mjög lítið vegna smávægilegra meiðsla og Guðmundur Steinn Hafsteinsson var hvíldur algjörlega vegna bakmeiðsla. Guðmundur Magnússon spilaði í 20 mín og fyrir leikinn var mikil spurning um þátttöku nokkurra leikmanna. En það rættist úr og Víkingur Ó mætti með 11 manna lið líkt og Stjarnan.

Þessi leikur varð hin besta skemmtun. Mikið skorað og gríðarlegur hraði í leiknum hjá báðum liðum sem hélst út allan leiktímann. Leikmenn Víkings Ó koma í gríðarlega góðu formi til leiks eftir Futsalið.

Leikurinn var rétt nýbyrjaður þegar Ólafur Hlynur Illugason kom boltanum í netið hjá Stjörnunni en var dæmdur rangstæður. Stjarnan átti síðan eftir seinna í leiknum að setja boltann í netið hjá okkur og vera einnig dæmdir rangstæðir.

Á sjöttu mínútu áttu Stjörnumenn fína sókn sem endaði með skoti í mallakútinn á Emir Dokara og þaðan barst boltinn aftur til Stjörnuleikmannsins sem þrumaði boltanum af stuttu færi uppí þaknetið. Ill- eða óverjandi fyrir Einar markvörð.

Tveimur mínútum síðan átti Edin Beslija glæsilega stungusendingu innfyrir vörn Stjörnunnar og þar kom Steinar Már Ragnarsson á fullri ferð og átti ekki í miklum erfiðleikum með að renna boltanum fram hjá úthlaupandi markverði Stjörnunnar. Sendingin minnti á sendingu Gylfa Þórs Sigurðssonar fyrir Swansea gegn Arsenal á síðustu helgi.

Þarna klikkaði penninn minn (bleklaus) og nú þurfti ég að skrifa allt eftir minni.

Það liðu ekki margar mínútur frá marki Steinars þegar Edin Beslija átti aðra og svipaða sendingu á áður en nú á Alfreð Má Hjaltalín sem komst einn í gegn og eins og Steinar renndi boltanum framhjá úthlaupandi markverðinum. Við komnir yfir og staðan orðin 2-1.

Þar stutt var til hálfleiks fór markvörður Stjörnunnar í tæklingu utan vítateigs við Alfreð að mig minnir og frá þeim hrökk boltinn til Steinars Más sem var fljótur að hugsa og sendi boltann umsvifalaust yfir allan pakkann og í opið markið. Staðan orðin þægileg 3-1 fyrir okkur og þannig var staðan í hálfleik.

Seinni hálfleikurinn varð síðan að mestu leyti eign Víkings Ó. Steinar Már Ragnarsson bætti fjórða markinu við með flottu skoti utan teigs sem hafnaði í hægra horninu niðri.

Alfreð Már skoraði síðan fimmta markið okkar, en ég er búinn að gleyma hvernig það var.

Edin Beslija skoraði sjötta markið með skot af 30 metra færi uppí hægra hornið og staðan orðin ótrúleg 6-1.

En Stjarnan náði að klóra í bakkann þegar Steinar Már fór full harkalega í bakið á einum þeirra innan teigs og góður dómari leiksins Magnús Þór Jónsson skólastjóri og mikill stuðningsmaður Liverpool dæmdi vítaspyrnu. Jón Haukur Hilmarsson sem kominn var í markið réði ekki við spyrnuna og staðan orðin 6-2. Kunnugleg tala úr tölfræði félaganna. Árið 1974 unnu Víkingarnir nefnilega Stjörnuna 6-2 í úrslitakeppninni í 3.deildinni það ár og það ár varð Víkingur Ó 3.deildarmeistari. En það er önnur saga.

Nú er janúarmánuður og liðið var að spila sinn fyrsta leik á árinu. Ég man ekki eftir Víking Ó í svona flottu formi eins og í dag á þessum tímapunkti ársins. Bæði liðin í dag voru kröftug og flottir fótboltamenn í báðum liðum. Við náðum okkur betur á strik í dag og verðskulduðum þennan góða sigur. Víkings Ó liðið lofar góðu. Helsta vandamál liðsins gæti verið lítil breidd. En það hefur alltaf ræst úr því fyrir mót og hef ég ekki trú á öðru en að það verði líka raunin í ár.

Margir leikmenn Víkings Ó voru að spila vel í dag og reyndar var enginn að spila illa. Ef ég á að nefna einhverja sem voru að spila á yfir pari þá get ég nefnt t.d. Edin Besljia, Eldar Masic, Steinar Már Ragnarsson og Alfreð Már Hjaltalín. Þeir Eldar og Edin áttu gjörsamlega miðjuna. Sóknin var spræk og síógnandi með þá Alfreð og Steinar fremsta. Í seinni hálfleik komu þeir Guðmundur Magnússon og Kristinn Magnús Pétursson inná og spiluðu framarlega og sama með þá og hina að þeir ógnuðu ekkert minna og var Guðmundur mjög óheppinn að skora ekki. Kristinn Magnús Pétursson átti flottan leik.

Í liði Stjörnunnar voru tveir af okkar fyrrverandi samherjum þeir Hilmar Þór Hilmarsson og Björn Pálsson.

Þessir leikmenn tóku þátt í leiknum: Einar Hjörleifsson, Jón Haukur Hilmarsson, Tomasz Luba, Emir Dokara, Ragnar Smári Guðmundsson, Dominik Bajda, Eldar Masic, Edin Beslija, Ólafur Hlynur Illugason, Anton Illugason, Alfreð Már Hjaltalín, Guðmundur Magnússon, Steinar Már Ragnarsson, Kristinn Magnús Pétursson, Fannar Hilmarsson og Guðmundur Steinn Hafsteinsson sem kom ekki inná í dag.

Næsti leikur sem búið er að staðfesta er æfingaleikur við BÍ/Bolungarvík þann 5.febrúar n.k. Nánar um það þegar nær dregur.

Frá síðasta leik Víkings Ó og Stjörnunnar.

Á morgun sunnudaginn 22.janúar 2012 mætast Vikingur Ó og Stjarnan í æfingaleik í Akraneshöllinni. Þetta verður fyrsti leikur Víkings Ó í ellefu manna bolta á árinu. Fróðlegt verður að sjá hvernig liðið kemur út eftir þessa löngu pásu frá í september.

Síðast þegar þessi lið mættust í leik var það bikarleikurinn frægi í 8 liða úrslitunum á Ólafsvíkurvelli þar sem leiknum var sjónvarpað beint um allt Ísland.

Stjarnan hefur sýnt okkur mikinn velvilja síðustu árin með því að lána okkur unga og efnilega leikmenn í þeirra röðum og meðal leikmanna sem hafa komið til okkar á láni eru t.d. Sindri Már Sigurþórsson, Heiðar Atli Emilsson, Hilmar Þór Hilmarsson og Björn Pálsson svo einhverjir séu nefndir.

Það verður gaman að mæta þeim á morgun uppá Skaga. Liðin hafa spilað mikið gegn hverju öðru í gegnum tíðina og leikirnir oft á tíðum verið hnífjafnir. Nú í dag er Stjarnan Pepsídeildarlið á meðan við bíðum þess færi að fylgja þeim upp í deild þeirra bestu.

Leikurinn á morgun hefst kl. 16.00.

Nú er búið að staðfesta tvo æfingaleiki. Sá fyrri verður spilaður núna á sunnudaginn 22.janúar í Akraneshöllinni kl. 16.00 gegn Pepsídeildarliði Stjörnunnar.

Seinni leikurinn verður gegn BÍ/Bolungarvík í Kórnum í Salahverfinu í Kópavogi. Sá leikur er ráðgerður sunnudaginn 5.febrúar kl. 16.00. Á heimasíðu BÍ/Bol er leiktíminn sagður kl. 15.50. Þannig að áhugasamir þyrftu að mæta tímalega til að vera öruggur um að missa ekki af upphafsmínútunum.

Ég veit að Ejub hefur áhuga á að spila einn leik til viðbótar fyrir Lengjubikarinn sem hefst hjá okkur þann 18.febrúar með leik gegn Íslandsmeisturum KR í Egilhöllinni.

En sem sagt, spennandi tímar framundan hjá okkur og reyndar öllum öðrum knattspyrnuunnendum.

Næsta mót sem Víkingur Ó tekur þátt í er A-deild Lengjubikarsins sem hefst hjá okkur þann 18.febrúar með leik gegn Íslandsmeisturum KR með Þorstein Má Ragnarsson innanborðs. Það er ágætt að rifja það upp hvaða lið eru með okkur í riðlinum. Það eru Pepsídeildarliðin Breiðablik, Fram, KR og Selfoss og síðan 1.deildarklúbbarnir Þróttur, BÍ/Bolungarvík og Haukar.

Þangað til stefnir Ejub að því að spila allt að 4 æfingaleiki. Þessa dagana er hann að athuga með mótherja og heyrði ég að mjög líklega verði spilaður æfingaleikur þann 5.febrúar n.k. gegn BÍ/Bolungarvík og leikstaður gæti orðið Kórinn. Einnig veit ég til þess að Ejub hefur beðið Magga Gylfa um æfingaleik en það er ófrágengið. Heimildarmaður minn er Maggi Gylfa!!!

Setti þessa punkta inn til að halda stuðningsmönnunum heitum og sýna að það er nóg um að vera þó allt sé ekki orðið opinbert. Sem dæmi eru þeir Eldar Masic og Edin Belija mættir á klakann og tóku þeir þátt í Futsal mótinu um helgina. Þeir eru rúmum mánuði fyrr á ferðinni en í fyrra.

Hvernig er það, er ekki Herrakvöld Víkings Ó framundan?

Því miður get ég ekki sett myndir hér inn vegna dularfullrar bilunar og þess vegna hef ég sett myndir inná Facebook í staðinn.

Nánar síðar þegar hlutirnir eru komnir á hreint.

(Birt án ábyrgðar).

Futsal
Úrslitaleikur um Íslandsmeistaratitilinn.

Víkingur Ó - ÍBV    0-5  (0-2)


Í dag átti Vikingur Ó helmingsmöguleika á að krækja sér í Íslandsmeistaratitil. Möguleikarnir fólust í því að leggja Pepsídeildarlið ÍBV að velli. Það tókst ekki í þetta sinn og er þetta annað árið í röð sem við spilum til úrslita í Futsal og bíðum lægri hlut. Þetta er svekkjandi og þá sértaklega í fyrra þegar við vorum betri aðilinn.  dag vorum við slakari aðilinn. Við náðum okkur ekki á strik og það var eiginlega ekki fyrr en við vorum orðnir 0-5 undir að maður fór þekkja liðið sitt. Þá spiluðu Víkingarnir eins og ég vildi að þeir gerðu allan leik. En þessi leikur er búinn og næsta verkefni er útiboltinn. Ejub sagði mér að hann stefndi að því að spila allt að fjóra æfingaleiki fram að fyrsta leik gegn KR í Lengjubikanum þann 18.febrúar n.k. Einnig sagði hann mér það að aðalvandræði liðsins væru það að hvergi væri hægt að æfa nema í íþróttahúsinu vegna mikilla snjóa. Og þó snjórinn væri ekki vantaði samt æfingaaðstöðu yfir vetrarmánuðina. Það vantar knattspyrnuhús á Snæfellsnesið.
En snúum okkur að leiknum. Eyjamenn byrjuðu leikinn af krafti og fljótlega sást að þeir lögðu aðaláhersluna á þétta vörn og þeir vörðust aftarlega. Albert Sævarsson stóð í markinu hjá þeim og var þrælsterkur en tókst honum að halda hreinu. Einhvernveginn fannst manni vera taugaspenna í Víkingsliðinu en leikmenn ÍBV spiluðu afslappaðra. Víkingsliðið hefur alltaf spilað betur en í dag og hugsanlega er skýringin sú að það var heill Íslandsmeistaratitill í húfi. Titill sem kannski Eyjamenn fannst ekki mikill titill en við þráðum. 

Fyrsta mark leiksins kom eftir aukaspyrnu sem þaut í gegnum allt og í netið. Annað markið var slysalegt svo ekki sé mikið sagt. Þá atvikaðist það að Einar markvörður fékk boltann útá velli og sendi boltann að marki en Albert markvörður greip hann og sparkaði honum rakleiðis beint í markið hinumegin. Skelfilegt að horfa á þetta marki. En Víkingunum gekk illa að brjóta vörn ÍBV á bak aftur og það var ekki fyrr en á lokasekúndum fyrri hálfleiks að Víkingur fékk víti á 11 metrunum (þau víti eru dæmd þegar annað liðið brýtur af sér í sjötta skiptið í sama hálfleik). Eldar Masic fór á punktinn og þrumaði boltanum öfugu megin við stöngina og framhjá. Staðan því í hálfleik 2-0 fyrir ÍBV. Í fyrri hálfleik fékk Tryggvi Guðmundsson ÍBV tvö gul spjöld og þar með rautt og spilaði hann því ekki nema 14 mínútur í þessum leik. Það dugði okkur ekki til að skora þó við værum einum fleiri í 2 mínútur.

Seinni hálfleikur byrjaði skelfilega fyrir okkur því á fyrstu 3 mínútunum fengum við á okkur tvö mörk og skyndilega var staðan orðin 4-0 fyrir ÍBV. Fyrra mark þeirra gerði Þórarinn Ingi Valdimarsson með þrumuskoti útvið stöng og seinna markið var slysalegt. Þá breytti laus bolti um stefnu og lullaði undir Einar og rétt innfyrir línuna. Fimmta mark ÍBV kom um stuttu seinna eftir vel útfærða skyndisókn. Staðan orðin 5-0 og þá loksins small Víkings Ó liðið í gang og átti restina af leiknum án þess að ná að skora framhjá Alberti markverði ÍBV sem átti stórleik.

Víkingur Ó varð fyrir áfalli fljótlega í leiknum þegar Guðmundur Steinn Hafsteinsson meiddist og gat ekki spilað meira. Hinum megin átti okkar fyrrum samherji Brynjar Gauti Guðjónsson stórleik. Hann ásamt Alberti voru bestu menn vallarins.

Bloggsíðan helgik.bloggar.is óskar ÍBV til hamingju með þennan sigur og þá sérstaklega þeim Magga Gylfa og Brynjari Gauta okkar fyrrum samherjum.

Reyni að setja myndir af liðinu og fleiru inná Facebook seinna í kvöld.

Þessir skipuðu lið Víkings Ó. Einar Hjörleifsson, Jón Haukur Hilmarsson, Edin Besljia, Eldar Masic, Tómasz Luba, Ragnar Smári Guðmundsson, Alfreð Már Hjaltalín, Heimir Þór Ásgeirsson, Kristinn Magnús Pétursson, Fannar Hilmarsson, Dominik Bajda, Guðmundur Magnússon og Guðmundur Steinn Hafsteinsson.

Á morgun getur Víkingur Ó orðið Íslandsmeistari í fyrsta sinn í innanhúsfótbolta, því í dag steig liðið stórt skref í þá átt með því að leggja lið Leiknis R að velli með fjórum mörkum gegn þremur í undanúrslitunum.

Víkingur Ó sem stillti upp mjög sterku liði þar sem þeir Edin Beslija og Eldar Masic voru mættir til leiks byrjaði þennan leik af krafti og náði frumkvæðinu fljótlega. Byrjunarliðið var Einar Hjörleifsson, Tomasz Luba, Edin Beslija, Guðmundur Magnússon og Guðmundur Steinn Hafsteinsson.  Samt var leikurinn mjög jafn en Víkingur Ó var að fá flest færin. En áhorfendur þurftu að bíða dágóðan tíma eftir fyrsta markinu og það kom í seinni hluta fyrri hálfleiks þegar Tomasz Luba skoraði 1-0 fyrir okkur af miklu harðfylgi. Það liðu ekki mjög margar mínútur þar til Eldar Masic jók forystuna í 2-0. Þannig var staðan í leikhléi. Fljótlega í seinni hálfleik lét Ejub hann Dominik Bajda inná og það var hann sem bætti þriðja markinu við eftir að Einar Hjörleifsson sendi stórkostlega sendingu til hans þar sem sendingin minnti á golfhögg með miklum bakspuna. Boltinn fór nefnilega fram fyrir Dominik og kom siðan til baka með miklum bakspuna og eftirleikurinn var auðveldur fyrir hann sem þrumaði boltanum efst í vinstra hornið og staðan orðin 3-0. Á þessum tímapunkti var maður farinn að eyja úrslitaleikinn en leikir eru ekki búnir fyrr en dómarinn flautar af og það sannaðist í þetta skipti. Leiknismenn náðu nefnilega að skora gott mark og strax í næstu sókn gerðu þeir annað og skyndilega var Leiknisliðið komið í gang og til alls líklegir. En Dominik var ekki á því að láta þá jafna því hann gerði sér lítið fyrir og þegar hann fékk boltann fyrir miðju marki rétt utan teigs lét hann vaða á markið og boltinn steinlá inni, efst í hægra horninu og staðan orðin 4-2 fyrir okkur. En þetta var ekki búið. Leiknir R fékk aukaspyrnu útá kanti sem undir eðlilegum kringumstæðum ætti að vera hættulítil en ekki í þetta sinn, því einn þeirra gerir sér lítið fyrir og þrumar boltanum í netið við nærstöng. Einhvernveginn fannst mér það hefði verið hægt að koma í veg fyrir þetta mark og staðan orðinn 4-3 og allt undir. Alveg undir lok leiksins verður Guðmundi Steini það á að brjóta af sér og Leiknir R fær víti af 11 metrunum. Spyrnan er tekin og hafnar í þverslánni. Annað vítið sem Leiknir misnotaði í leiknum. Hitt kom í fyrri hálfleik í stöðunni 2-0 og fór "kílómeter" framhjá.

Þessi sigur okkar er virkilega ánægjulegur. Annað árið í röð sem við spilum til úrslita um Íslandsmeistaratitilinn. Í fyrra tapaðist úrslitaleikurinn frekar ósanngjarnt fyrir Fjölni 2-3. Nú er lag og með sigri tryggir liðið sér þátttökurétt í Evrópukeppninni í Futsal næsta sumar. Í fyrsta sinn í sögu Vikings Ó sem Evrópusæti ynnist.

Með ÍBV spilar okkar fyrrum leikmaður Brynjar Gauti Guðjónsson og þjálfari þeirra er Ólafsvíkingurinn Magnús Gylfason og þar með er hægt að segja að á morgun verða að minnsta kosti tveir Ólsarar (eða einn Ólsari og einn úr Breiðuvíkurhrepp)  Íslandsmeistarar .

Leikurinn á morgun hefst kl. 14.00 í Laugardalshöllinni og er frítt inn. Mætum öll, bæði til að hittast og hvetja liðið til sigurs. ÁFRAM VÍKINGUR Ó.

Nú stendur yfir úrslitakeppnin í Futsal innanhúsfótbolta. Þetta er mun skemmtilegri innanhúsfótbolti en var spilaður hér áður fyrr. Í dag fóru fram tveir leikir. Fjölnir sigraði Fylki með 4-3 eftir að Fylkir hafði leitt 1-3 í hálfleik og staðan verið 3-3 lengi, lengi. Í hinum leiknum sigraði Leiknir R. undir stjórn Willum Þórs Þórssonar lið Víðis í Garði 10-1 og var sá sigur öruggur.

Á morgun heldur keppnin áfram. Þá bætast liðin tvö sem sátu hjá í dag við. Það eru að sjálfsögðu við í Víking Ó og lærisveinarnir hans Magga Gylfa lið ÍBV.

Fyrri undanúrslitaleikurinn er viðureign Víkings Ó. - Leiknis R. Mjög forvitnilegur leikur enda hafa þessi tvö lið spilað mikið gegn hvoru öðru síðasta áratuginn. Þá reyndar úti. Leikur Vikings Ó og Leiknis R hefst stundvíslega kl. 14.00 í Laugardalshöllinni.

Seinni undanúrslitaleikurinn er viðureign ÍBV og núverandi Íslandmeistara í Futsal lið Fjölnis úr Grafarvogi. Þessi leikur verður örugglega hörkuleikur og hefst þessi leikur strax á eftir leik okkar gegn Leikni eða kl. 15.30.

Takist okkur vel upp gegn Leikni og náum að klára leikinn bíður okkar úrslitaleikur á sunnudaginn kl. 14.00 í Laugardalshöllinni gegn annaðhvort liði ÍBV eða Fjölni.

Til gamans má geta þess að úrslitaleikurinn um Íslandsmeistaratitilinn í fyrra var einmitt á milli Víkings Ó og Fjölnis. Sá leikur endaði 3-2 fyrir Fjölni og tóku þeir fyrir vikið þátt í Evrópukeppninni í Futsal fyrir hönd Íslands.

Í kvöld hefst úrslitakeppnin í Futsal í Laugardalshöllinni. Lið Víkings Ó situr hjá og mun hefja leik kl. 14.00 á morgun á sama stað. Það er til mikils að vinna, því sjálfur Íslandsmeistaratitillinn er í húfi og þátttökuréttur í Evrópukeppninni í Futsal. Evrópukeppnin fór fram í ágúst í fyrra og var spiluð erlendis.

Leikirnir í úrslitakeppninni eru þessir:

Föstudagur 6.janúar

18.30 Laugardalshöll     Fjölnir - Fylkir
20.00 Laugardalshöll     Leiknir R. - Víðir

Laugardagur 7.janúar

14.00 Laugardalshöll     Víkingur Ó. - Leiknir R./Víðir
15.30 Laugardalshöll     ÍBV - Fjölnir/Fylkir

Sunnudagur 8.janúar

14.00 Laugardalshöll      Úrslitaleikur


Ef okkur tekst að komast í úrslitaleikinn gætum við alveg eins hampað titlinum. Ef það skyldi gerast er skemmtilegra að hafa verið á staðnum og orðið vitni að því þegar meistaraflokkur Víkings Ó varð meistari. Og það sem myndi vera enn skemmtilegra við þetta er að sá titill ef hann næðist myndi koma á afmælisdegi Þorgríms Þráinssonar okkar fyrrum leikmanns. En það á eftir að spila leikina og mótherjarnir firnasterkir!    

Eyjólfur Sverrisson landsliðsþjálfari U-21 árs landsliðsins hefur valið 29 manna hóp til æfinga hjá U-21 árs landsliðinu. Einn af þeim sem hann velur er Þorsteinn Már Ragnarsson okkar fyrrum leikmaður. Það er ekki hægt annað en að óska Þorsteini til hamingju með þennan áfanga sem er stór. Einnig vil ég hæla Eyjólfi fyrir þetta val. En ein spurning sækir á mig. Hvers vegna var Þorsteinn ekki valinn fyrr, á meðan hann var leikmaður Víkings Ó.? Það má ekki skipta máli að leikmenn séu valdir til æfinga hjá landsliði nema þeir séu í "réttu" liði. Ef svo er hjakkar landsliðið ávallt í sömu förunum og kemst ekkert áfram. Það eru öll lið á landinu sem halda úti öflugu unglingastarfi að framleiða góða leikmenn.

Ef við skoðum ensku úrvalsdeildina í dag. Hvar voru íslensku leikmennirnir þar aldir upp? Heiðar Helguson kemur frá Dalvík, Eggert Gunnþór Jónssson frá Austra Eskifirði, Grétar Steinsson frá KS á Siglufirði og Gylfi Þór Sigurðsson frá Breiðablik. Í 1.deildinni eru t.d. Aron Einar Gunnarsson frá Þór á Akureyri, Ívar Ingimarsson kemur frá Súlunni á Stöðvarfirði og Hermann Hreiðarsson kemur frá ÍBV í Vestmannaeyjum.

Þessi upptalning sýnir það að úti á landi geta leynst sterkir leikmenn fyrir landslið. Og þeir leynast þar. Gott dæmi um lið sem hefur skapað marga góða og sterka leikmenn er Völsungur frá Húsavík. Einnig ÍA. 

En leikmennirnir eiga að eiga sjens á landsliðssæti þó þeir spili ekki með liðum á höfuðborgarsvæðinu. Ef getan er til staðar.

Síðast var gerð könnun á því hvort þið vissuð hvaða leikmaður skipti fyrst um félag úr Víking Ó yfir í annað félag. Þeir sem svöruðu Konráð Hinriksson svöruðu rétt. Hann Konni á þann "vafasama" heiður að hafa verið fyrsti leikmaður Víkings Ó til að hverfa á braut. Hann skipti í Fylki og spilaði fullt af leikjum með þeim eftir það.


Flestir svöruðu Atli Alexandersson þegar hann skipti í FH, en það var rangt svar.

Ný könnun er komin eða á leiðinni inn.

Ég sendi öllum lesendum mínum á þessari síðu bestu óskir um gleðileg jól og farsælt komandi ár. Vonandi fáum við spennandi knattspyrnuár árið 2012. Lið Víkings Ó mun áreiðanlega gleðja okkur með góðum leik og góðum árangri undir styrkri stjórn Ejubs Purisevic.

Hafiði það gott um jólin og mætum síðan á úrslitakeppnina í Futsal 6.-8. janúar þó það væri nú ekki nema að hitta hvern annan.

Það er lítið um að vera í okkar herbúðum þessa stundina. Engar fréttir í gangi af leikmannamálum og bara nokkuð rólegt á þeim vígstöðum. Það segir okkur bara það að liðið okkar er í ágætu standi. Framundan er úrslitakeppnin í Futsal í byrjun janúar eða nánar tiltekið dagana 6.-8.janúar. Leikstað er ekki búið að ákveða ennþá, en liðin sem munu mæta til leiks eru:, Fjölnir undir stjórn Ágústar Gylfasonar fyrrum leikmanns Vals og fleiri liða, Fylkir undir stjórn Ásmundar Arnarsonar, Leiknir R. undir stjórn Willum Þórs Þórssonar, ÍBV undir stjórn Magnúsar Gylfasonar Ólafsvíkings, Víðir Garði undir stjórn Gísla Matthíasar Eyjólfssonar sem er fyrrum leikmaður Víðis og síðast en ekki síst okkar ástkæri klúbbur Víkingur Ó undir stjórn okkar ástsæla þjálfara Ejubs Purisevic. Þessir þjálfarar eiga allir það sameiginlegt að sleppa öllum fordómum gagnvart Futsal og þeir kunna að notfæra sér þennan leik til að gera sína leikmenn að enn betri leikmönnum. Futsalið hefur hjálpað mikið til að búa til tekníska leikmenn. Brasilíumenn spila Futsal frá fæðingu til þess tíma þegar þeir eru komnir uppí meistaraflokk. Hvaðan hafa margir af bestu leikmönnunum komið í gegnum tíðina? Svarið er Brasilíu.

Víkingur Ó fékk góða gesti í dag til Ólafsvíkur til að spila við sig í Íslandsmótinu í Futsal. Þetta var Pepsídeildarlið Fylkis. Fyrri leik liðana lauk fyrir skömmu í Fylkishöllinni með 4-3 sigri Víkings Ó í háspennuleik. Það verður að taka ofan fyrir liðum KB og Fylkis fyrir að mæta til leiks í Ólafsvík, en eins og menn muna mætti lið Hvíta Riddarans/Aftureldingu ekki til leiks í vikunni. Í útiboltanum getur lið sem mætir ekki til leiks unnið mót eða riðil. Þess vegna velti ég því fyrir mér hvort KSÍ ætti ekki að setja klásúlu í reglugerðina um Futsal að ef lið mætir ekki til leiks skuli liðið sæta bæði sektum og frávísun frá úrslitakeppni gerist það að liðið mæti ekki til leiks. Einnig þar af finna gulrót til að fá fleiri lið til að taka þátt. Fordómar sumra þjálfara fyrir Futsal er með ólíkindum. Futsal er það sem gerði og gerir Brassana góða. Víkingur Ó getur þakkað Futsal mikið hve liðið er með marga tekníska leikmenn í sínum röðum, ásamt þjálfaragenginu.

Í dag fór leikurinn fram í Íþróttahúsinu í Ólafsvík. Þetta var að mér skilst hörkuleikur þar sem hart var barist. Víkingur leiddi í hálfleik 4-2 og sigraði síðan leikinn með 11 mörkum gegn 7. Ég efa það ekki að leikmenn Fylkis hafi átt gott ferðalag vestur og fengið ágætis tilbreytingu frá borgarlífinu.

Mörk Víkings Ó í þessum leik gerðu þeir, Guðmundur Steinn Hafsteinsson 5, Guðmundur Magnússo 3, Tomasz Luba 2 og Ragnar Smári Guðmundsson 1. Hverjir spiluðu fyrir Víking Ó hef ekki á hreinu en ef einhver sem les þetta veit það mætti hann skrifa nöfnin hér fyrir neðan.

Bæði Víkingur Ó og Fylkir hafa tryggst sér sæti í úrsltakeppninni sem fer fram dagana 6.- 8.janúar 2012 og þar mætast 6 lið í tveimur riðlum. Víkingur Ó og Fylkir gætu mæst aftur og önnur líkleg lið til mæta til þessarar úrslitakeppni eru t.d. ÍBV, Fjölnir, Leiknir R, og Viðir. Afríka á reyndar enn sjens en ég tel að ÍBV og Leiknir nái þessum tveimur sætum.

Þessir leikmenn Víkings Ó spiluðu þennan leik. Gæti vantað einn í upptalningunni. Einar Hjörleifsson, Suad Bega, Guðmundur Magnússon, Guðmundur Steinn Hafsteinsson, Tomasz Luba, Heimir Þór Ásgeirsson, Ragnar Smári Guðmundsson, Ólafur Hlynur Illugason, Fannar Hilmarsson, Jón Haukur Hilmarsson og Gunnar Bjarki Baldvinsson
 

Mótanefnd KSÍ er búin að raða niður í riðla í A Lengjubikarnum næsta vetur. Í hverjum riðli eru 8 lið. Fjögur Pepsídeildarlið og fjórir 1.deildarklúbbar. Víkingur Ó byrjar keppnina með engum smá leik, því fyrsti leikur okkar verður gegn Íslandsmeisturum KR í Egilshöllinni þann 18.febrúar 2012 kl. 15.00 skv. planinu. Þetta verður í fyrsta skipti sem Víkingur Ó mætir KR í opinberum knattspyrnuleik. Aðeins Keflavík verður það lið í tveimur efstu deildum Íslandsmótsins sem við höfum aldrei mætt. Reyndar spilaði HSH gegn þeim í bikarleik fyrir rúmum 10 árum síðan.
Eitt atriði enn sem var okkur í hag var það að við lentum ekki með liðunum fyrir norðan eða austan í riðli og sparar það jafnvel eina eða tvær langar ferðir. Allir okkar leikir verða leiknir í Akraneshöllinni, Egilshöll og einn í Fífunni.

En skoðum leikina:

Lau.  18.2 2012  Egilshöll kl. 15.00      KR - Víkingur Ó. 
Sun.  26.2          Akranes kl. 17.00      Víkingur Ó - Haukar
Lau.  10.3          Egilshöll kl. 15.00      Fram - Víkingur Ó
Sun.  18.3          Akranes kl. 14.00      Vikingur Ó - BÍ/Bolungarvík
Lau.  24.3          Egilshöll kl. 17.00      Þróttur R. - Vikingur Ó
Sun.   1.4          Akranes  kl. 14.00      Víkingur Ó - Selfoss
Lau.  14.4          Fífan      kl. 12.30      Breiðablik - Víkingur Ó.

Í kvöld lék Víkingur Ó sinn fjórða leik í Íslandsmótinu í Futsal innanhúsknattspyrnu. Mótherjinn var 3ju deildar lið KB og er ekki hægt annað en þakka þeim kærlega fyrir að hafa mætt til leiks í kvöld. Mörg félag fara bara helst ekki útfyrir höfuðborgarsvæðið á vetrartíma. En Víkingarnir eru sterkir í þessari íþrótt og til að mynda spiluðu þeir úrslitaleikinn í keppninni síðasta vetur. Í kvöld tókst þeim að vinna KB sannfærandi með 20 mörkum gegn fjórum. Þessi úrslit þýða það að Víkingur Ó er komið í úrslit í keppninni enn eitt árið og nú spái ég því að þeir geri harða atlögu að Íslandsmeistaratitlinum. Í kvöld vantaði leikmenn síðasta leik. Einar Hjörleifsson var ekki lentur þ.e.a.s. Guðmundur Jensson SH 717 og þ.a.l. vorum við án hans. Einnig voru þeir Ólafur Hlynur Illugason og Dominik Bajda fjarri góðu gamni í kvöld. Við megum vera með 12 leikmenn á skýrslu en vorum einungis með 10 í kvöld.

Svo óska ég KB mönnum góðrar ferðar heim og að þeir fari varlega.

Mörk Víkings Ó í kvöld gerðu þessir:

Heimir Þór Ásgeirsson 6
Guðmundur Magnússon 4
Steinar Már Ragnarsson 3
Ragnar Smári Guðmundsson 2
Guðmundur Steinn Hafsteinsson 2
Kristinn Magnús Pétursson 1
Alfreð Már Hjaltalín 1
Tomasz Luba 1

Eftirtaldir voru í 10 manna leikmannahópi Víkings Ó í kvöld.
Jón Haukur Hilmarsson sem varði markið, Tomasz Luba, Ragnar Smári Guðmundsson, Alfreð Már Hjaltalín, Guðmundur Steinn Hafsteinsson, Guðmundur Magnússon, Heimir Þór Ásgeirsson, Kristinn Magnús Pétursson, Steinar Már Ragnarsson og Anton Illugason.

Næsti leikur er á miðvikudagskvöldið eftir tvo daga í Ólafsvík gegn Hvíta Riddaranum/Aftureldingu og hefst leikurinn kl. 20.00.

Smá leiðrétting var gerð á markaskorurunum. Guðmundur Magnússon gerði 4 mörk en ekki 3 eins og getið var áður og Steinar Már Ragnarsson gerði 3 en ekki 4. Ég er búinn að leiðrétta það hér fyrir ofan.

Fyrirhuguðum leik Víkings Ó - KB sem fara átti fram í hádeginu á laugardaginn hefur verið frestað til mánudags kl. 19.00. Leikstaður er Íþróttahús Snæfellsbæjar í Ólafsvík.

Pepsídeildarlið Fylkis var næsti mótherji okkar í Futsal á þeirra heimavelli. Leikurinn varð gríðarlega jafn og spennandi, það spennandi að hann var ekki fyrir viðkvæmar sálir. Okkur tókst að vinna þennan leik með einu marki í leik sem gat dottið báðum megin en sem betur fer fyrir okkur datt sigurinn okkar megin.

Sem sagt, leikurinn fór 3-4 með sigri okkar. Samt byrjaði leikurinn ekki vel fyrir okkur, því snemma í leiknum gerðu leikmenn Fylkis tvö mörk gegn okkur á stuttum tíma eftir að hafa í bæði skiptin unnið boltann af þremur sækjandi leikmönnum Víkings Ó og brunað upp gegn fámennri vörn okkar. Þrátt fyrir þessa vondu stöðu var maður alveg rólegur. Og hvers vegna var maður rólegur? Jú, Fylkismenn komust varla fram fyrir miðju, þvílíka pressu settu leikmenn Víkings Ó á þá þegar þeir unnu boltann. Og áður en dómararnir blésu til hálfleiks hafði Alfreð Már Hjaltalín komið boltanum tvisvar í netið hjá þeim og staðan því 2-2 í hálfleik.

Í seinni hálfleik kom miklu ákveðnara og sterkara lið til leiks hjá Fylki. Nú gekk þeim betur að svara okkar taktík með því að gera nákvæmlega alveg eins og við, að hápressa. Það voru ekki margar mínútur liðnar af seinni hálfleiknum þegar Guðmundur Magnússon kemur okkur í 2-3 með hörkuskoti úr teignum í stöngina og inn. En Fylkir gafst ekki upp og um miðjan hálfleikinn komst einn þeirra einn gegn Einari markverði, en Einar sá við honum og varði skotið hans. En boltinn hrökk aftur til þessa leikmanns sem náði að renna boltanum undir Einar og í netið. Staðan þar með orðin 3-3 og útlitið þannig næstu mínúturnar að leikurinn muni enda með jafntefli.

En Guðmundur Steinn Hafsteinsson var ekki á því að taka ekki öll þrjú stigin sem í boði voru og skoraði gott mark þegar ein og hálf mínúta voru eftir og kom okkur yfir, 3-4 og þessari stöðu héldum við út, þrátt fyrir harðar sóknaraðgerðir Fylkismanna.

Þessum stórskemmtilega Futsal leik lauk því með sigri okkar manna og þar með erum við með fullt hús stiga eða 9 stig og trónum á toppnum í riðlinum þegar keppni er hálfnuð. Þrír síðustu leikir okkar verða allir spilaðir í Ólafsvík og má segja að úrslitakeppnin í byrjun janúar blasi við.

Næsti leikur okkar verður í Ólafsvík laugardaginn 10.des kl. 12.00 (hádeginu) og síðan kemur sá næsti og hann verður líka í Ólafsvík miðvikudaginn 14.des kl. 19.00 gegn Hvíta Riddarinn/Aftureldingu og svo mæta Fylkismenn til Ólafsvíkur laugardaginn 17.desember kl. 13.00.

Fyrir örfáum árum síðan, sögðu margir um okkur í Víking Ó að við værum útlendingalið. Þvílíkt bull sem menn létu útúr sér þá. Á sama tíma voru meira og minna flest lið landsins í öllum deildum með marga erlenda leikmenn og ég tók það saman á þeim tíma, en birti ekki, að það voru stærri klúbbar úr stærri samfélögum sem notuðu fleiri erlenda leikmenn en við. En það er rétt að við byggðum liðið okkar uppá bæði ungum uppöldum leikmönnum, erlendum leikmönnum og lánsmönnum frá heiðursklúbbum að sunnan. En hvers vegna er ég að minnast á þetta núna þegar við erum með miklu færri erlenda leikmenn en mörg af liðum landsins. Jú, það er vegna þess að á meðan við vorum gagnrýndir og talað niður til okkar vegna fjölda erlendu leikmannanna, vorum við að framleiða á fullu unga framtíðarleikmenn. Þrír þeirra spiluðu í kringum 100 leiki með okkur þar til þeir skiptu um félag. Þetta eru þeir Brynjar Gauti Guðjónsson, Brynjar Kristmundsson og Þorsteinn Már Ragnarsson. Og fleiri eru á leiðinni.

Er eitthvað utanbæjarlið sem hefur selt þrjá unga uppalda leikmenn til Pepsídeildarliða á einu ári?

Svarið er nei. Málið er það að leikmenn utanbæjarliða hafa farið í Pepsídeildarlið, en þeir voru ekki keyptir heldur fóru til að freista gæftunnar. En okkar leikmenn fóru vegna eftirspurnar í þá, frá nánast öllum Pepsídeildarliðunum auk erlendra klúbba. Þeir voru seldir fyrir pening.  

Smám saman höfum við skapað okkur hefð í 1.deildinni. Fyrstu árin voru hrikalega erfið fyrir okkur vegna þess að sumir dómarar virtust ekki sætta sig við að svona lítill sveitaklúbbur væri að þvælast í 1.deildinni og það þótti oft gott að dæma frekar á okkur þegar vafaatriði komu upp þar sem við vorum taldir eiga fáa stuðningsmenn, sem myndu verða æfir við dómarana yfir óréttlætinu. En það sannaðist í undanúrslitunum þegar við fjölmenntum á Kaplakrika að við eigum miklu fleiri stuðningsmenn en menn þorðu að vona. Sem dæmi um dómgæsluna sem við fengum fyrstu árin okkar, að fjórum sinnum var endurtekin vítaspyrna hjá mótherjum okkar eftir að Einar hafði varið fyrri spyrnuna. Hve oft sjáið þið vítaspyrnu endurtekna í Pepsídeildinni?? Aldrei. Sem betur fer hefur virðing okkar eftir sex keppnistímabil af síðustu sjö og að hafa náð að landa 4.sætinu aukist innan knattspyrnuhreyfingarinnar. Enda erum við að gera ágætishluti og tilheyrum ekki hópi skuldugra íslenskra félaga. Þessi virðing sem okkur hefur hlotnast hefur gert það að verkum að við erum farnir að sjá eðlilega dómgæslu í okkar leikjum. Dómgæslu sem öll lið landsins eiga heimtingu á að fá. Samt koma stundum upp eins og gengur og gerist atvik sem orka tvímælis eins og þegar Ejub Purisevic var dæmdur í 3ja leikja geðþóttabann. Þar skeit dómari leiksins í buxurnar fyrir þvætting í skýrslu sinni til dómaranefndarinnar. En bannið er tekið út og vonandi lendir enginn íslenskur þjálfari í þvílíku óréttlæti í framtíðinni.